Meghalaya a∙doko Jaimaa Coal Private Limited ni chalaienggipa Vaishno Devi Traders Private Limited niamgri koela bikotaniko aro badinganiko dakenga ine Champer M Sangma ni badi ka∙doanggipanina talate on∙china High Court sorkariko ge∙etataha. Batanggimin changoba ia apsan company-an gipin biaprangona koelarangko niamgri watanio jak dongpagipa ong∙a ineba janapangaha.
East Jaintia Hills a∙jaoniko ge 440 truck garirango 5,340 MT nigita koelarangko salani donga, indiba Right to Information Act-o badi ka∙e am∙sandianio sorkarini maming see rakkianirang dongja ine badi ka∙gipa janapangaha. Truck garirango koelarangko gate salenggipani jreaniko watatna skang toe nianirangko aro see rakkianirang dongna nanga jedakode am∙an salo mesokna man∙gen ineba ua aganangaha. Niamgri koelako badingenga ine matnanganiko Transport Department ni Secretary affidavit baksa anti gittamni gisepo sakkiko mesokchina a∙dok sorkariko High Court ge∙etangaha.
