HM Shangpliang-ni NPP dol baksa bakrimna am∙gipani bidingo BJP dol chanchirimanggen

Gitcham MLA aro BJP ni dilgipa Himalaya Shangpliang ni NPP baksa bakrimna am∙gipani bidingo maming u∙iatanirangko man∙kujaenga ine BJP State President Ernest Mawrie August 7 tariko aganangaha. Pilak kamrangko ka∙na skangba BJP ni disciplinary action committee-oni re∙bachengna nanggen aro committee-ni ge∙eta donggija una show cause notice-ko on∙a man∙jawa ine Mawrie aganangaha.

Shangpliang-ni BJP doloni ong∙katna am∙aniko Mawrie social media-nigitasa una chakpagiparangni janapatanio ma∙sina man∙aha jeon re∙baenggipa Lok Sabha election o ua NPP ni ticket o susaanggen ine janapataha. BJP ni dal∙dalgipa programme-rango HM Shangpliang-ni  bak ra∙gijaniko kobor ra∙timgiparangni janape sing∙on, ua Education Department-ni Advisor ong∙e somoirangko jokatna man∙jaha ine Mawrie aganangskaaha.