A∙doko Inner Line Permit (ILP) ko ra∙gatchina dabianiko Prime Minister Narendra Modi nianiko dakanggen ine Meghalaya sorkarina ka∙dongani kattarangko ku∙chakangaha. Iani gimin Home Ministry baksa agan-golpogrikaniko dake aro a∙dok sorkari baksa jringna kobor ra∙grikanirangkoba dakanggen ine Prime Minister aganangaha. Mongolbar salo Chief Minister Conrad Sangma baksa adita Cabinet Minister rangni Delhi ona re∙ange PM Modi ko grongani somoio ua ia kattarangko aganangaha.
Tom∙anio adita chanchirimanirangko dake a∙dokni dingtang dingtang nanganirangko janape on∙aniko PM chakchike knatimangaha ine Sangma Budbar salo kobor ra∙timgiparangna parakataha. 2019 bilsini December jao Meghalaya Assembly o ILP ko ra∙gate on∙china tik ka∙aniko dake ma∙mong sorkarinaba u∙iatangani ja∙mano maming aganchakanirangko dakjagenchimoba, iani bidingo niataniko dakanggen ine PM Modi u∙iatskaaha. Unbaksana a∙dokni chatro chatrirangni neng∙nikanirangkoba janapjole Khasi aro Garo ku∙sikko Eight Schedule o ra∙gate on∙chinaba Sangma mol∙molangjolaha.
