Batanggimin July 24 tariko Chief Minister ni Winter Capital aro Roster system na dabienggipa dolrang baksa agangrikani somoio obosta ong∙ani bidingo am∙sandianiko dakenggipa West Garo Hills a∙jani pulis dolrang ja∙manchakenga ine parakataha. Ia mamlani bidingo am∙sandianiko dilenggipa Turani Inspector General of Pulis (IGP) M K Singh aro gipin sak bonga Pulis Officialrang ta∙raken reportrangko a∙dokni Director General of Police (DGP) pakwatanggen ine u∙iatangaha.
Ia obosta ong∙anio CM ni janggina kenchakaniko intelligence reportrangko man∙genchimoba WGH a∙jani pulis dolrangni simsakgijanio konta gittam rangna so∙sojengjeng ong∙anirangko nikangaha jeon sak 18 pulis dolrang mata buanirangko man∙aha aro gari bol 21 mangna nosto ong∙atanirangkoba man∙aha. So∙sojengjeng ong∙atanio jak donggipa manderangko sakkirango pangchake pulis dolrang sak 48 manderangko rim∙aha. Ia mamlao Trinamool Congress ni dilgipa Richard M Marak koba jak dongpaa ine pulis dolrang rim∙aha. Rim∙a man∙gipa bang∙bata manderang BJP aro Trinamool Congress dolni memberrang ong∙a ineba pulis dolrang parakataha.
