Batanggimin salo Tura Mini Secretariat-o kajia golmal ong·atanina Winter Capital aro Backlog policy na dabidilenggipa sak gittam dilgiparangko Unlawful Activities (Prevention) Act, Meghalaya (Maintenance of Public Order) Act aro Prevention to Damage to Public Property Act-o pangchake West Garo Hills a·jani pulis dolrang mokordoma ka∙angaha.
Turao Winter capital aro backlog policy-ko ra∙gatchina dontonggija okimu chake dabianiko July 11 tarikoni a·bachenge dakdilgipa Labenn Ch. Marak, Balkarin Marak aro Bernita R. Marak ni kosako July 24 tariko golmal ong·atanina ge∙gittam niamo pangchake badi ka·angaha. Ia mamlao jak donggipa sak 49 manderangkoba rim∙angaha.
ACHIK dolni Labenn Ch. Marak, GSMC dolni Co-Chairman Balkarin Marak aro ACHIK dolni General Secretary Bernita R. Marak, uamangko ia mamlao bak donga ine badi ka∙doanganina an∙tangtangko chelchakna Meghalaya High Court-o jamin ra∙e dorgastoko on∙angaha. Indiba Megahalaya High Court ni Justice Wanlura Diengdoh a∙dok sorkariko uamangni kosako badi ka∙gipa lekkarangko, re∙baenggipa August 11 tariko bichal ka∙taiani somoio mesokchina ge∙etangaha.
