Williamnagar a∙jani Warimagre gittimo India a∙songni jakgitel ong∙aniko gisik ra∙nagita Azadi ka Amrit Mahotsav o pangchake hydromet station ni gamchatani bidingo mikrakatani program-ko Water Resources Department ong∙atangaha. Hydromet station-ko Warimagreo rikaniko, sorkarini ja∙ku de∙aniko ma∙siate on∙an baksa uni gamchataniko ia programme-o talate on∙angaha. Ia programme-o adita songni manderang aro water resource departmentni kam ka∙giparang bak ra∙anganiko nikangaha.
Hydromet station-ko rikanichi dingtangmancha Simsang chibimani dal∙aniko, apalanirangko aro mikka balwa rakaniko u∙ina dakchakanggen. Unbaksana ia station-ko donanichi chibimani obostako niksamsoe manderangna senggnang mikrakataniko on∙sonagita dakchakna miksongani ong∙a. Ia station rang National Hydrology Project (NHP) ni mongsonggipa bak ong∙a jekon 2016-o World Bank Central aro State agency-rang baksa nangrime kamko ka∙angenga. EGH a∙jao damgni station rang gnang jean Williamnagar Warimagre-o damsa aro Rongjeng Chijong-o damsa ong∙a.
