Salni teng∙anoniko bijoli bikotaniko mikkangchi nambate jakkalangnagita da∙al salni bako Chief Minister Conrad Sangma Solar Mission ko a∙doko a∙bachengate on∙angaha. Ia program-o Meghalaya Non-Conventional & Rural Energy Development Agency (MNREDA) aro Power Department ni kam ka∙e Chief Minister’s Solar Mission ko a∙bachengatna man∙anina Sangma mittelpilaniko on∙angaha.
Ru∙uta bilsirangonin MNREDA dingtang bewalo bijoli bikotaniko a∙bachengatna miksongani dongenchimoba a∙dok sorkarini nanggipa dakchakanirangko chu∙ongagita on∙a man∙jani gimin chu∙sokatna man∙jaha. Ia gitalgipa re∙mikkanganiko a∙bachengatanichi MNREDA dingtang mancha saloniko bijoli bikote a∙dokni manderangni neng∙nikarangko olgrokatnagita dakchakanggen ine CM parakata.
Batanggimin sal somoirango a∙doko bijolini bidingo bang∙a neng∙nikanirangko chagronggenchimoba CM Solar Mission-ni gita manderangna chu∙ongagita bijoliko jakkalna cholrangko mikkangchi on∙anggen ine Sangma agandapangaha.
