NEP ko ra∙gatna bang∙bataan namnikjaode re∙mikkangani dongjawa: NEHU Vice Chancellor

A∙doko National Education Policy (NEP) ko ra∙gatna bang∙bataan namnikjagenchimode re∙mikkangani dongjawa ine NEHU ni Vice Chancellor, Prabha Shankar Shukla aganangaha. NEP ko ra∙gatna miksonganiara a∙dokni chatrorangna namgninasa dakenga jekon da∙o ra∙gatjaode uamangna dal∙bea gimaaniba ong∙gen ine Shukla parakangaha.

Meghalaya College Teachers’ Association (MCTA) NEHUSU aro HYC dolrang baksa Vice Chancellor ko grongna tik ka∙gimingita re∙bajaha ine Shukla janapangaha. Re∙baenggipa August 14 tariko NEHUSU aro HYC baksa grongani donga aro ia tom∙bimonganiko sorkari dakatna nanga ine Shukla aganangaha. NEP ko ra∙gatani bidingo NEHU, a∙dokni college rangna dakchakaniko on∙agitaba tarisamsoaha ine ua agandapangaha.