East Garo Hills a∙jao Azadi Ka Amrit Mahotsav ko dakmesokanigita India a∙songni jakgitel ong∙ani bilsi 75 gadapaniko maniani chin gita Meghalaya Fishery department gital pokkri cho∙e na∙tok jile cha∙gipa manderangna nanga bosturangko suale on∙angaha. Ia kamrangko Meghalaya State Aquaculture Mission (MSAM-2.0) program ni gita na∙tok jile cha∙giparangna dingtang mancha dakchakaniko on∙a dakangaha. Meghalaya a∙doko na∙tok jile janggitangna pangchakgipa manderang bang∙aniko nike aro chu∙ongagita dakchakaniko on∙a MSAM scheme ko March jani 2012 bilsio ra∙bae on∙angaha.
Ia program-o pangchake na∙tok jilanio gisik nanggipa manderangna uamangni jila kem∙anio namdapataniko ra∙bana miksonge dakgipa ong∙a. Na∙tokrangko jile bading chiwale janggi tangani cholrangko tang∙doatna aro na∙tokrangko gipin a∙dokoni ra∙bana nanggija a∙jatangonikon man∙a dakchakaniba ong∙a. A∙arangko bangbang donaigija uarangko pokkri tarie na∙tok jile cha∙china skie on∙an baksana scheme-ni gita loan rangko on∙e sorkarini dakchakaniko uamangna on∙angenga. A∙doko jakgitel ong∙aniko manina tarisamsoagita dingtang dingtang department-rang Azadi Ka Amrit Mahotsav ko gisik nange a∙jatango program-rangko ong∙atangenga.
