North Garo Hills, Kharkutta PHC ni Dr. K. M. Momin, naljokatna su∙gipa bijiko ra∙chakna jechakgipa Rangsa songona dingtang mancha manderangko grongna re∙angaha. Ia somoio ua songni manderang aro ma∙aparang baksa golporime uamangni biji su∙na jechakani ja∙pangrangko u∙ie ra∙angan baksa Health Centre rangona bi∙sa an∙pakna re∙bana gong∙gijaniko sing∙e ra∙angjolaha.
Medical Officer departmentni officialrang baksa sanna bannanio bang∙a program rangni bidingo songni manderangko mikrakatagita agantalate on∙anganiko dakangaha. Unbaksana biji su∙ani gamchatani aro namgnirangko songni manderangna skie on∙angjolaha. An∙o donggipa ma∙giparangko sanna bannani a∙damrangona re∙bae bi∙sa an∙pakna naljokani aro nambate dakna man∙ani bidingo agantalate on∙anganikoba dakangaha.
