North Garo Hills a∙jani Kharkutta Constituency-ni ning∙o donggipa Menadoba songni bilsi 21 ong∙gipa Pa Leverson K. Marak aro Ma Laigia G. Momin-ni demechik Tra Liza G. Momin, re∙anggipa July 27 oni 29 tarikona Goa songjinmao ong∙atanggipa, Miss India Tourism Spark-o susae, chegipa ong∙aha. Uni cheanichi A∙chik jatna aro Garo Hills na mingnamgipa mikkim rasongko ra∙baaha.
Iana agreba, Tra Liza Momin batanggipa 2019, 2020, 2021 bilsirangoba North East a∙dokrango iandakgipa susaanirango bakko ra∙e, changgittamna kingking chegipa ong∙angaha. Indake ia chango Miss India Tourism Spark-o susae chegipa ong∙anichi, uni mingnamgipa gunko a∙gilsakna parakaha aro dingtangmancha A∙chik jatko niksengataha.
Tra Liza G. Momin-ni kobor ra∙timgiparang baksa ku∙siliting gita agangrikanio parakatani gitade, ua chonaonin Nagaland a∙doko donge poraianirangko dakangaha. Ua poraia matchotani ja∙mano Cavin Craw-ko dakaha, indiba uano chu∙sokna gita man∙jani gimin, Indian Army-na uni miksonganiko aganangaha. Indake, ua Miss India Tourism Spark-o susae, cheani ja∙mano songtangona re∙bae an∙tangni ma∙drang mahari aro songni nokni manderangko Sonibar salo grongeaha.
