A∙chikrangni daka rika aro dakmesokaniko skie ra∙na Certificate Course on A∙chik Folk Art (CAFA) ko Tura Don Bosco College o August jani 12 tariko oprake on∙angaha. Ia course ko College-ni Internal Quality Assurance Cell (IQAC) ni dakchakaniko man∙e English aro Garo department chalaianggen. Ia program-o NEHU Tura Campus English Department ni HOD Prof. Dwijen Sharma mongsonggipa ong∙e programo bakko ra∙angaha. Prof. Sharma dingtang mancha program-o donggipa manderangko daka rika dakbewalrangko ripingna aro tangkame rakkina didianirangko dakangaha.
Dr. Barbara S. Sangma chatro chatrirangna aro programo donggiparangna daka rikani aro sol∙a reparangni bidingo tal∙e agane on∙anganiko on∙angskaaha. Ia program-o A∙chikrangni gitrangko bang∙a chatro chatri dolrang ring∙sale dakmesokanirangkoba dakangaha. CAFA ni miksongani aro syllabus rangni bidingo CAFA ni Coordinator Dr. Colnat B. Marak agantalate on∙angaha. College ni Principal Fr. Bivan Mukhim ia namgipa kamko a∙bachengatanina department rangna katchapaaniko on∙angaha aro dakchakaniko on∙a bakrimpana ra∙chakangaha.
