Meghalaya aro Tamil Nadu ni a∙dok sorkarirang nangrime Tamil Nadu ni Kasturba Gandhi Hospital o tom∙bimonge Intensive Specialized Training ko donge matchotgipa sak 29 doctor rangko mande ra∙aniko dakna programko ong∙atangaha. Ia medical officer rang Comprehensive Emergency Obstetrics Care (CEmOC), Ultrasonography, aro Life Saving Anaesthetic ko jadokna dingtangmancha skie ra∙aniko matchotangaha. Re∙anggipa bilsini September jao a∙dok damgnini sorkarirang MoU ko soi ka∙grikaha jeon Tamil Nadu ni sorkari Meghalaya a∙doko sanna bannani a∙bao changgipa sapgipa manderangna skie on∙a aro kamrango rimnapanio dakchakna ra∙chakangaha.
Ia program-o a∙dok damgni ni Health Minister Thiru. Ma Subramanian aro Ampareen Lyngdoh mongsonggipa sokgipa ong∙e bakko ra∙angaha. Ia namgipa ja∙ku de∙aniara Meghalaya a∙dok ni Community Health Centre rango a∙dokni manderangna nambata sanna bannanirangko on∙agita kam ka∙ani ong∙a ine Lyngdoh aganangaha. A∙dokni doctor rangna trainingko on∙ani miksonganiara kona noksikni CHC rango changgipa sapgipa doctor rang chu∙onggijani gimin skie on∙aniko dakangaha ine parakataha.
