A∙dok Sokari dingtang dingtang Community Health Centre (CHC) rango Ultrasonogram (USG) ko songdime on∙anganiko Health department jako ra∙e kamko ka∙angenga. Skanggipa changna Dainadubi, Chokpot aro Dadenggre songni CHC rango USG ko songe on∙angaha ine koborna parakataha. CHC-rango USG ko songe on∙aniara an∙o donggipa me∙chikrangko porikka ra∙anio altubatatna aro gipin sanna bannaniko dakanio namdapatna gita jaku de∙ani ong∙a.
Apsandake a∙dokni gipin a∙jarango jekai Mawryngkneng, Riangdo, Laskein aro Pynursula jolrango USG ko songe on∙angaha ine parakataha. Batanggimin sal somoirango CHC rango USG dongjani a∙selo sagipa manderang gipin biaprangona porika ra∙anirangko dakna nangaona ga∙ake neng∙nikanirangko man∙a. Ia neng∙nikanirangoni naljokatna gita USG ko ra∙bae manderangni namgnina aro sanna bannaniko namdapatna kamko ka∙angenga.