Tura songjinmao Manipur a∙dokni tom∙tomanina dingtangmancha ABDK IV, Youth Ministry aro Baptist Youth Fellowship India apsan bakrime Candlelight Prayer Service ko August jani 13 tariko AB Mission Compound o ong∙atangaha. Ia program-ona bang∙a toromo bebe ra∙gipa ma∙aparang, chadamberang aro toromni dilgiparangni bak ra∙aniko nikangaha. Manipur a∙doko ong∙enggipa obostana ua somoio gitrangko ringange bi∙chakanirangkoba dakangaha.
Manipur a∙doko so∙sojengjeng ong∙ani May jaoni a∙bachenge da∙onaba namkujaenga aro dakgrik dingrikani dontongani bimangan nakata dongkujaenga. Lok Sabha session-o Manipur-ni bidingo golpogrikanio namen ding∙chaoni aro jegrikanirangko nikna man∙angaha. Garo Hills ni dingtang dingtang toromo bebe ra∙giparang Manipur a∙dokna kal∙impaaniko on∙a bi∙chakan baksa Candlelight service rangko bang∙a biapon dakanikoba nikangenga.
