Meri Mitti Mera Desh programme ko West Garo Hills a∙jani 120BN CRPF dolrang Tura Ballonggre o ong∙ate bol bi∙sarangko ge∙aniko dakangaha.
Ia programme ko India a∙songni jakgitel ong∙aoni chang 76 gipa Azadi Ka Amrit Mahotsav o pangchake ong∙atangaha. CRPF ni sipairang, uamangni nokdangni manderang, dilgiparang aro chatro chatrirang ia programme o bakko ra∙angaha.
120 BN CRPF ni Commandant Pramod Kumar Singh jaktangchi te∙gatchu bol bi∙sako ge∙angaha aro mikkangchi tangsekgipa a∙gilsak ong∙atnaba bak ra∙enggipa sakantikon didiangaha. An∙chingni ma∙gitcham pagitchamrangni nama bewalko ja∙rike bol wa∙ako ripingna aro chadamberangna u∙iatna jedakode mikkangchiba maming neng∙nikanirangko chagrongnagita nangjawa ine ua ku∙pattianikoba on∙angaha.
Ia programme ko ong∙atanio bite nanggipa bol rang jekai te∙gatchu, chambu, neem aro komila rangko ge∙angaha. Programme ko ong∙atani miksonganiara chatro chatrirang, ma∙apaarang aro wilwilao donggipa manderangna bol wa∙ani gamchataniko mikrakataniko on∙agita dakangaha ine parakataha.
