India a∙songni jakgitelani salo an∙ching dingtangmancha gisik aro ka∙tongni katchaaniko man∙a maina ia salon an∙chingni a∙song British rangni sason ka∙aoni jakgitel ong∙aniko man∙aha. Bang∙bea dilgiparang jekai Mahatma Gandhi, Subhas Chadra Bosh, Bhagat Singh aro bang∙a gipin matgrikrang British rangni sason ka∙aoni naljokaniko man∙a uamang baksa dakgrik dinggrikangaha. Ia dakgrikanio bang∙a matgrikrang janggirangko a∙songna on∙kanganiko an∙ching namen ma∙sia. Ia salo an∙ching uamang sakantikon dingtangmancha gisik ra∙na aro mande ra∙aniko dakna nangchongmota.
A∙chik jatoni Pa Togan Nengminza ni dilanichi unbaksa bang∙a A∙chik matgrikrang bigil gipokrangoni chel∙chaksona dakgrike jatna aro a∙songna janggiko on∙kangaha. Uamang jatna ka∙saani donge bilakgipa silchidarerangko milam aro te∙rik re∙suniko sepi tarie dakgrikna re∙mikkangangaha. Rasonggribee silchidareni bilakaniko amsokjae uamang Bristish rangni jakchi so∙otako man∙aha aro janggiko kenagri dakgrike on∙kangaha. Ian an∙chingna rasong chabeani aro matgrikni gunko mesokani ong∙a unbaksana jatna ka∙sae on∙kange dangdikaniko skie ra∙ani cholba ong∙a.
Ia salo an∙ching a∙song gimikni matgrikrangko gisik ra∙asan ong∙aigija A∙chik matgrikrangni bigil gipokrangko warachakanikoba gisik ra∙na nangchongmota. Mikkangchini re∙mikanganio an∙ching uamangni gun aro jatna ka∙saaniko ja∙rike janggi tangna jotton ka∙na nanga. Re∙baenggipa sal somoirango jatni nanganina aro namgnina ku∙cholsan ong∙e matgrikni an∙chi donganiko mesoke kamrangko ka∙angna nanggen.
India a∙song namen dingtangbegipa dakarikani bang∙begipa, ku∙sik a∙palbegipa aro dingtang dingtang songdonggipa jatrang bang∙begipa ong∙a. Jakgitelna dakgrikanio ku∙monganiko mesokanian an∙chingna mikkim ra∙songko ra∙baaha aro ku∙monganichi pilak neng∙nikaniko amna man∙a ine ia salo an∙ching gisik ra∙na nangao ga∙aka.
