A∙dokni pilak a∙jarango India a∙songni chang 77 gipa jakgitelani salko gisik ra∙nagita da∙al salo manianiko dakangaha. Shillong songjinmani Polo kal∙chakram biapo a∙dokni skotong dilgipa Conrad Sangma mongsonggipa sokgipa ong∙e Indiani Flag ko songdoe on∙angaha. Conrad Sangma ia salko gisik ra∙na Shillong o uni noktangoba pringni somoio flag ko songdoe on∙enba manderangna nama skaniko on∙angjolaha.
Apsandake Tura songjinmaoba pilak ma∙apaarang aro chadamberang India a∙songni Flag ko ra∙bite New Tura Matchakolgre LP school kal∙chakram biapona bak ra∙na re∙batokaniko nikangaha. A∙dokni Speaker aro North Tura ni MLA Thomas Sangma ia manianio mongsonggipa ong∙e sokbaaha.
A∙doko ia 77 gipa jakgitelani salo dingtang dingtang a∙jarango manderangni gisik nangbee bak ra∙angniko nikangaha. Re∙jomaniko dakenggipa skulni bi∙sarang, scout & guide cadre rang, police dolrangni dakmesokanikoba nikangna man∙aha. Chrok mesaani aro doka dama ringsalnikoba dingtang dingtang skulni chatro chatrirang nambee dakmesokanganiko dakangaha. Maniani matchotani ja∙mano bi∙sarangna dingtangmancha kal∙susaanirangko ong∙atanggen ine koborko man∙soaha.
