Chang 77 gipa jakgitelani salko Shillong songjinamao maniani salo Chief Minister Conrad Sangma uamangni sorkarini bilsi 5 o dakna miksonganirangko janapangan baksa adita chu∙sokatna nanggiparangko ku∙mitchetangaha. A∙dokko tang∙doatna aro manderangni janggi tanganiko namdapatna 2023-28 bilongen gamchatbegipa ong∙a ine Sangma aganangaha.
MDA sorkari ia re∙baenggipa bilsi 5 o a∙doko nambata rama jal∙angrangko tarina, sanna bannanio bi∙sarangko nirokani gadangko tang∙doatna, chirangko sokatna aro bijoli wataniko namdapatna miksonganirangko Sangma parakangaha. Unbaksana nokrangko rike on∙anio namdapatna, internet ko songantiona sokatna, sakantina sanna bannaniko on∙a, sports ni rika cho∙aniko namdapatnaba Sangma janapangaha. Sangma ni agananio ua skia porani a∙bako tang∙doatna aro uandake bang∙a dingtanganirangko ra∙bana ku∙chake ra∙angaha. Uamangni bilsi bonga sorkariko rikanio uamang manderangna lakh 5 kamrangko ra∙bae on∙a miksonganiko janapangaha.
Re∙baenggipa salrango ma∙mong sorkarini programrangko ra∙bae bilakbatatna aro bang∙a Externally Aided Project (EAP) rangko kam ka∙anggen ine Sangma aganangaha. Dingtang dingtang a∙dokni program-rang jekai FOCUS, PRIME, YESS Meghalaya, MOTHER, PROGRESS aro Home Stay Scheme apalbatata kam ka∙anggen ineba Sangma parakangaha.
Ia kamrangko ka∙na chu∙sokataniona sokatna Sangma a∙dokni manderangko ku∙cholsan ong∙e bakrimpachina dingtangmancha mol∙molanikoba dakangaha.
