Re∙anggipa August 13 tariko walni 11 bajimango NEHU ni hostel no. 20 o dongenggipa LLM ni chatro aro A∙chik NEHU Students’ Union (ANSU) ni Advisor ni kosako kragija doka satani kamko ka∙anina jegale saksa Social Activist Cherian Momin NEHU ni Vice Chancellor Prof. Prabha Shankar Shukla na chittiko sedoataha.
ANSU na on∙kange aro manderangni namgnina kam ka∙gipa chatroni kosako indakgipa kragijagipa kamrangko ka∙aniko knae suk ong∙gijaniko Momin parakataha. Ia obostani kosako ta∙rakbee mokordoma ka∙aniko dakna nanga aro bakan niatna nangchongmota ine Momin raken jegalaniko chittio janape aganataha.
Indakgipa kamara a∙selo ga∙akgipa mandenasan ong∙aigija mikkangchi tom∙tome meligrike donganiko nosto ka∙gipaba ong∙a ine Momin parakataha. Dingtang dingtang jatrangoni poraienggipa chatro chatrirang indakgipa a∙selrangoni naljoke jajrengani gri aro kenani gri mikkangchi poraiangna gita University ni ning∙o nirok simsakaniko dakangchina Momin didiataha.
NEHU ni administration, law enforcement agency ni officer aro a∙dok sorkariko ia namgijagipa kamko ka∙giparangni kosako kragipa ja∙kuko de∙e sastiko on∙a nanga ine janapataha. Ia kamrangko ta∙rake nirokatjagenchimode mikkangchi indakgipa a∙selo ga∙aktaiaona sokatgen ineba ua u∙iataha. Jatsa jat gipin baksa meli nangrime ma∙sichakgrike dongna aro mikkangchi poraienggipa chatro chatrirangko naljokatna raka ja∙ku de∙aniko dakangchinaba Momin chittio see mol∙molataha.
