August 13 tariko NEHU University o LLM ko poraienggipa A∙chik chatro saksa hostel number 20 o dongenggipako kragija doka satani bidingo A∙chik Nehu Students’ Union (ANSU) NEHU ni Vice-chancellor na chitti sedoataha. Ia ong∙a obostani bidingo badi ka∙doanganiko dakangan baksa ANSU dolrang a∙dok sorkari, NEHU administration aro Pulis Department-ko raka ja∙kuko de∙na didianganiko dakangaha. Uamangni agananigita ian jatsa jatgipini kosako saksa sakgnini kamni a∙sel tom∙tomaniko nosto ka∙gipa ong∙a aro NEHU o dingtang dingtang biaprangoni poraina re∙bagiparangna jajrenganiko ra∙bagipaba ong∙a ine parakataha.
University ge∙sa bidako ra∙na dakchakgipa aro nama bewalko skie ra∙ani a∙damsa ong∙a jeon indakgipa kamrangko ra∙chakna man∙ja ine ANSU dolrang raken jegalaniko dakataha. Bang∙a changon campus ni ning∙ao kragija kamrangko ka∙aniko nikronga jeon maming ja∙ku de∙anirang dongja aro da∙o iako nie dongaiode mikkangchiba apsan dake ong∙gija kamrangko nikangna man∙gen ine uamang parakataha. Batanggimin 2019 bilsioba A∙chik chadambe saksako NEHUSU ni election o chakatna amani bidingo ka∙mik kenatanirangko nikaha ine uamang agandapangaha.
Unbaksana jako ra∙enggipa pulis officer-rang name am∙sandianiko dakgija dongaiode mikkangchi NEHU o poraienggipa gipin a∙jani chatro chatrirangna naljokani dongjawa ine ANSU dolrang parakataha. Ia apsan chittiko uamang a∙dokni Home Minister, Chief Secretary, DGP, Deputy Commissioner aro SP na watataha.
