Tura Dakopgre-o donggipa P A Sangma Stadium-ko garirangko donchakani gri rikani a∙sel, ramarango garirangko donengani gimin Rongkhon Songgital o donggipa manderang re∙a doanio namen neng∙nikaniko man∙enga ine parakataha.
P A Sangma Stadium-o Inter mahari football ko kal∙susaaniko ong∙atengani gimin robol kal∙giparang aro nina re∙bagiparang garirangko donna biap dongjani a∙selo Rongkhon Songgital chi re∙gipa ramaosa garirangko donenga ine uamang janapataha. Manderangni salanti re∙ruraenggipa ramaosa garirangko donani a∙sel Office re∙giparang, skul, college re∙gipa chatro chatrirangna namen neng∙nikani ong∙enga ine Rongkhon Songgital-ni manderang parakataha.
Rongkhon Songgitalo donggipa manderang salanti re∙ruraanio rama samtangtangon chakpilgija garirangko donengani gimin, P A Sangma Stadium-ko rikanio, garirangko donchakani grisa rikahama ine sing∙doanikoba dakataha.
