Garo Hills o dingtang dingtang maharirangni gisepo robol kal∙susaani re∙anggipa bilsionin namen niksenganiko man∙baenga. West Garo Hills a∙jaosan ong∙aigija maharirangni gisepo robol kal∙susaaniko East Garo Hills a∙jani Samanda Block o ong∙atanikoba nikangaha.
Ia Chra Mahari Football Tournament ni final kal∙susaaniko mijal salni bakko Manda Mahari aro Rongmithu Maharini gisepo kal∙angaha. Manda rang goal 4 ko man∙e chegipa ong∙aha jeon Rongmithu rang goal 2 kosan man∙rikskaaha.
Ia final kal∙susaanio Williamnagar ni MLA Marcuise Marak mongsonggipa sokgipa ong∙e bakko ra∙angaha jeon ua kal∙anio bak ra∙giparangna trophy aro boksisrangkoba suale on∙angaha.
Apsan dake re∙baenggipa 19 tariko Tura songjinmao Maharirangni gisepo robol final kal∙aniko P.A Sangma Sports Complex o nikna man∙anggen. Me∙asarangni gisepo Tegite aro Agitok mahari susaanggen unbaksana me∙chikrangni gisepo Mangsang aro Mrong maharirang susaaniko dakangskagen.
