Mijal salni bako Shillongo 2023 bilsini Super Elite Pathway Programme-ko Meghalaya State Olympic Association, Director of Sports Youth Affairs baksa nangrime ong∙atangaha. Ia programme-ona Meghalaya a∙dokni dingtang dingtang a∙jaoni batanggimin salo kal∙susaanirango seokako man∙gipa sak 15000 mang manderang an∙tangtangni changa sapaniko kal∙e dakmesokangaha. Dingtang dingtang kal∙susaanirang jekai 20 Metre Sprint, Standing Long Jump, Vertical Jump aro 10 meter Ladder kat∙susaanirango kal∙na cholko man∙e seokako man∙a jinma baksa susaangaha.
Ia kal∙susaanirango gimikna bate nambate dakmesokgiparangoni sak 9 ko Super Elite Athlete ong∙pae nambata gadango skie ra∙angnagita seokako man∙aha. Ia sak 9 seokako man∙giparangoni sak 4 North Garo Hills a∙jani Bettingstar N Sangma, Chanangbirth Marak, Henry Yoga A. Sangma, Enriyana G. Momin aro South Garo Hills a∙jani Kasanchi Donesa Marak ong∙a. Ia chadamberangko NEHU campus ni ning∙ao donggipa Sports Authority of India (SAI) o done aro uamangko International gadangni trainingko Australia a∙songni Olympian Ian Campbell skianiko on∙angenga. Ia seokako man∙gipa kal∙susagiparangko Shillong-ona be∙enigita porikkako ra∙na bak ra∙echina okamatako man∙aha.
