North Garo Hills a∙jani Sildubi Sub-Centre ni ning∙o donggipa Harikhona community hall o Nikshay Diwas aro Village Health Nutrition Day (VHND) ko gisik ra∙nagita August jani 16 tariko program-ko ong∙atangaha. Ia program-o batrikrikgijagipa sabisiko unbaksana an∙o donggipa ma∙giparangko porikka ra∙aniko dakangan baksa bijirangko su∙ani aro Yoga koba ong∙atjolangaha.
Tuberculosis (TB) sabisiko man∙ao mesokgipa chinrang aro ia sabisiko champengani cholrangni bidingo manderangna u∙iate on∙anganiko dakangaha. Unbaksana nokdang dakani bidingo chanchisamsona aro tarisamsona mongsonggipa dakna nanggiparangko ma∙apaarangna agantalate on∙anikoba tom∙ani somoio dakangaha. An∙o donggiparangko name an∙pakna man∙agita sanna bannaniko on∙enggipa health centre rangona re∙angani gamchataniko skie on∙angan baksana an∙tangtangni be∙en na simsakani, rongtal an∙talani, ORS rangko tariani aro gipin health programrangni bidingo mikrakatanikoba on∙angjolaha.
