Ri-Bhoi a∙jani Kurkalang Bhoirymbong kal∙chakram biapo BFI East Zone Elite Men’s Boxing Championship 2023 ko oprake on∙ani salo A∙chik chadambe saksa Balnas Sangma cheanichi a∙bachengaha. Ua Assam a∙dokni su∙grikgipa baksa susaanio uni changa sapaniko nambate jakkalanichi cheaniko man∙e kal∙susaanio re∙chakatna man∙aha. Ia boxing kal∙susaaniko Ri-Bhoi a∙jani Boxing Association ong∙atenga jeon Assam, West Bengal, Sikkim aro Meghalaya a∙dokni boxing kal∙susagiparang bakko ra∙angenga.
Sangma na agre Meghalaya a∙dokni gipin susagiparangba chegipa ong∙e ia kal∙susaanio a∙bachengaha. A∙dokni sakgipin kal∙susagiparang Sanjeev Maskul Sikkim a∙dokni su∙grikgipa baksa susae amataha aro Khrawbok Marwein West Bengal a∙dokoniko amate kal∙aniko cheanichi re∙chakatna man∙aha. Ia Boxing Championship ko mijal salni bako Ribhoi a∙jani ADC Raja Brahma unbaksa gipin officer rangni dongpaanio oprake on∙angaha.