An∙o donggipa ma∙giparangni sanchakram a∙damrango bi∙sa an∙pakani namgniko Health Department a∙dokni dingtang dingtang a∙jarango manderangna mikrakataniko dingtangmancha on∙angenga. Apsandake NGH a∙jani Norongkol aro Bishrampur Sub-Centre ni ning∙o ga∙akgipa songni manderangna sanchakram biaprango bi∙sa an∙pakani namgniko Health Department o kam ka∙enggiparang agantalate on∙anganiko nikangna man∙aha. Ia program-o sanchakram a∙damrango skia man∙gipa changgipa sapgiparang jekai doctor, nurse aro ASHA rangni ma∙gipa aro bi∙sako an∙pakan somoio naljoke rakkina man∙ani bidingoba agantalate on∙anganiko nikangaha.
Unbaksana sanchakram biaprango bi∙sako an∙pakaniko dakjagenchim ong∙ode namgijagipa obostarangona sokna man∙ani aro bang∙a neng∙nikanirangko manderangna u∙iataniko dakangaha. Sanchakram biaprango rongtal an∙talaniko ja∙rike aro simsakaniko on∙e maikai ma∙gipa aro atchidaldal bi∙sako sabisirangoniko naljokatna dakchaka uarang pilakkon agantalate on∙angaha. Ia sanchakram biaprango a∙no donggiparangna bi∙sa an∙pakanio kupattiani, bi∙sako simsakani aro ma∙gipa bi∙sako kraa bewalo aldu mitangna nangani pilak skie ra∙ani cholrangko man∙ani bidingoba aganatalate on∙angaha
