William Nagar Polytechnic College o skie poraie ra∙aniko a∙bachengatgijaan nosto ong∙a

East Garo Hills a∙jani William Nagaro 2018 bilsioni oprake on∙gipa Polytechnic College ni pakmarang skie on∙aniko a∙bachengatgijaan nosto ong∙engaha ine Niksamso Garo Community Organisation (NGCO) parakataha. Ia college ko oprake on∙a indita bilsi ong∙genchimoba da∙onaba a∙bachengate on∙a man∙kujaenga unbaksana rika cho∙anirangkoba galchipe donenga ine NGCO dolrang janapataha.

Re∙anggipa April jao uamangni dol Chief Minister ko gronge college-ni rika cho∙aniko nirokatpanichi mol∙molaniko dakaha jeon gnigipa gadangko taridapaniko a∙bachengataha. College ni rikgitcham pakmarang galchipe donanichi da∙o nosto ong∙aniko nikna man∙engaha ine NGCO dolrang koborna parakatskaaha. Iarangko nitaie uamang rika cho∙aniko name kam ka∙china aro ta∙raken iano skie ra∙aniko a∙bachengatchina mol∙molanikoba dakangaha.