Tura Don Bosco College o poraie matchotanggipa chatro chatrirangna August 17 tariko jinma chimonge grongtaiani cholko college ni campus ning∙o ong∙atangaha. Ia program-ona college o poraigitcham chatro chatrirang re∙batoke bak ra∙aniko nikangna man∙a. Ia tom∙dilaniko college ni Pricipal aro College Alumni Committee bakrime ong∙atangaha.
Tom∙aniona re∙bagiparangko college ni Principal rimchaksoani kattarangko aganan baksa program-ko ong∙atani miksonganiko talatangaha. Apsandake college-o skigiparangoni saksa Dr. Barbara S. Sangma tom∙aniko ong∙atani bidingo talataniko dakange re∙bagipa sakantiko kusi ong∙e rimchaksoan baksana mittelangaha.
Tura Don Bosco College Garo Hills o ge∙sa gamchatbegipa bida nok ong∙a jeon kona noksikni bidana a∙sikgipa chadamberang skia poraniko ra∙na re∙batoka. Ia programko ong∙atanichi college-ni chatro chatrirangna aro mikkangchi porainasienggipa chadamberanga bidani gamchataniko aro namgipa dakmesokaniko skie ra∙na cholko on∙ani ong∙a. Saksa sakgipini chu∙sokanganiko nike dal∙rorona, ja∙gamrangko jarike skie ra∙na aro jotton ka∙aniko dondikgija krengdilana miksonge tom∙aniko ong∙atangaha.
