Tura songjinmao ong∙atanggipa Inter Mahari Football Tournament, August 19 tariko me∙a aro me∙chik dolrang bon∙kame susaaniko dake matchotangaha. Final su∙saaniko PA Sangma Sport Complex, Dakopgre o soka chakangaha jeon a∙dokni Chief Minister Conrad Sangma, GHADC ni MDC rang, Mahindraganj ni MLA Sanjay Sangma, Rangsakona ni MLA Subir Marak, WGH DC Jagdish Chelani, District Sports department ni officialrang, Pulis officerrang aro gipin gadangni manderang kal∙aniko nina re∙batokaha.
Me∙asa dolrangni bon∙kamgipa kal∙anio Agitok mahari aro Tegite mahari an∙saobee kal∙e susagrikaniko nikangna man∙aha. Dolgnini gisepo biltinggrike kal∙e susaanio Agitok maharirang bon∙kamao Tegite Maharini kosako goal sa ko chipe 2023 bilsini Inter Mahari Football Tournament kal∙susaanio chegipa ong∙aha. Kal∙a gimiko Tegite maharirang krenge kal∙genchimoba susaanio goal ko chipna man∙jae Agitok maharirangni jakchi finalo sirikna nangao ga∙akaha.
Me∙chik dolrangni gisepo kal∙anio Mrong mahari aro Mangsang mahari biltinggrik kal∙susaangaha. Ia final kal∙susaanio Mangsang mahari goal sa ko chipaha aro Mrong mahari goal gni ko chipe 2023 Inter Mahari Football Tournament o chegipa ong∙angaha.
Me∙chik doloni Shantila M. Sangma goal 6 ko chipe kal∙a gimiko goal chipatgipa ong∙aha aro Nakatchi M. Sangma nambatgipa kal∙e dakmesokgipani bimingko man∙angskaaha. Cheran Maharirang bak ra∙gipa maharirangni gisepo niamko kakketo ja∙rikgipa dol ine mingteaniko man∙angskaaha.
Apsandake me∙asa dolrangni gisepo Bolwari maharani Chekam Tangrik B. Marak kal∙a gimiko goal chipatgipani boksisko man∙angaha aro nambate dakmesokgipa kal∙gipani bimingko Bardy Sangma Agitok maharioni man∙angskaaha. Tegite Maharini Jayangbirth T. Sangma namgipa goalkeeper ni bimingko man∙angaha aro me∙asa dolni gisepo niamko kakketo jarikgipani bimingko Bolwari maharirang man∙angaha.
