Garobadha oni tariange WGH a∙jani Selsella oni Rajabala songona re∙gipa ramarang jagittamni gisepo dal∙dalgipa bostu gatgipa truck garirang re∙ruraani a∙sel nosto ong∙engaha ine PWD Department u∙iataniko dakangaha. Ia rama Ampati PWD ni ning∙o ga∙aka aro ia ramako tariani project ko Badri Rai & Company na pakwataha. Nosto ong∙gipa ramarangko somoigita tarianiko dakgenchimoba chu∙onggita nalarang dongjani gimin mikkachirangni a∙sel taraken nosto ong∙pilaniko man∙aha. Garobadha oni Rajabalaona km 30 mangsan donggenchimoba iako re∙na konta sa na bate nangenga ine u∙ina man∙aha. Ramarangni ta∙rakbee nosto ong∙aniko dongkame kam ka∙gipa company-o sing∙sandianiko dakna re∙angon uamang golpona gong∙gijaniko mesokaha ine janapataha.
Bang∙bata bakni ramarang jagittam ong∙on nosto ong∙aha aro nambate tarinagita ja∙kurangko de∙jaode gimikan nosto ong∙aona sokgen ine Selsella songo songdongkamgipa manderang aganangaha. Ampati PWD officialrang baksa iani bidingo golporimaniko dakon dal∙dalgipa garirang nangana bate rong∙te gate salgipa truck rang re∙ani a∙selosa ong∙aha ine aganangskaaha. Forest Department ni dal∙dalgipa truckrangna ramako batsotna bostu gatna dongimin niamara 9 MT san ong∙a jekon niamko ja∙rikgija 35 MT oni 40 MT mangna bostuko gatani a∙sel ramarang senggnang nosto ong∙aniko nikna man∙aha. Da∙o dipet ia truck rang Bangladesh a∙songona ro∙ongrangko watatna ia ramakon jakkalenga ine Ampati PWD official rang aganaha. Nosto ong∙gipa ramarangko PWD tarie on∙genchimoba dal∙dalgipa truck rangni re∙aniko dontongatjaode apsan obosta ong∙pilaigen ine officialrang agandapangaha.
