SWGH Ampati jolo niamni a∙palo a∙dokni bolrangko Assam ona salangenggipa gariko GSU Zikzak unit aro Garoland State Movement Committee dolgni bakrime rim∙nagita man∙aha. Bolrangko gate salangenggipa garini nokgipa Menerul Miah ong∙a aro ia gariko bolrang baksa Tura DFO na pakwate on∙angaha. Cha∙ue badingsrukangenggipa gari nokgipani kosakoba raka ja∙kuko de∙china dolgni NGO rang Zikzak-ni IC na mol∙molaniko dakangaha ine u∙iataha.
Mikkangchi indake kragija kamrangko ka∙jachina aro a∙dokni bol wa∙arangko ripingna pilak ma∙apa aro chadamberangko GSU Zikzak unit ni General Secretary Chaseng Marak didianganikoba dakataha. Unbaksana chiring chibisik do∙o matrangko ka∙sae jakkalchina aro uamangni dongram biaprangko tangchapilatna sakantikon tarisamsona mol∙molaniko on∙angaha.
