SWGH Ampati o District School Education Officer (DSEO) poraia skiani gadangko namdapatna aro bidachi janggi tangani cholrangko a∙jani manderangna ra∙bana saksa sakgipin ni ku∙pattianiko u∙ina August 21 tariko tom∙bimonge chanchirimaniko Ampati Multy-Facility Centre o ong∙atangaha. Ia chanchirimaniko SWGH a∙jao pilak skia porako pakwatanio bak donggipa manderangko ku∙cholsan rimbachimongna, a∙jani skia porani obostako u∙ina, neng∙nikanirangko chanchirimna aro namdapatani a∙bako nisamsona miksonganio ong∙atangaha.
Ia somoio mikkangchi namgipa skia porani gadangko pakwatna, bidako chu∙gimik apsan sualna aro niam gitalni bosturangko jakkalaniko skie on∙ani bidingoba chanchirimangaha. Bakko ra∙gipa sakantian namgipa cholrangko skia porani a∙bao ra∙baaniko aro uarangko jakkalanio agan ku∙pattianirangko on∙angaha. Lekka porako skie on∙ani bidingo songsalo dilgiparangni aro ma∙apaarangni bak ra∙na nanganikoba chanchirimangaha. Una agreba skulrango name niroke aro chasong gitalni bosturangko skiani a∙baona ra∙bae chatro chatrirangna janggi tangani cholrangko on∙a chanchiangaha.
