Re∙anggipa July 24 tariko Tura CM Office mikkango obosta ong∙anio rim∙a man∙giparangni bidingo Garo Hills-ni dol bonga NGO-rang ADE, FKJGP-Garo Hills Zone, GSU-CEC Tura, AYWO aro FAF Robibar salo Skotong Minister Conrad K. Sangma-ko gronge dosgri manderangna jamin on∙kujaengani gimin nirokatpachina mol∙molangaha. Uamangni agananigitade ong∙anggimin obostao biapona re∙anggiparang jatna ka∙oksiesa dakna nangako dakangaha aro pulisrangni manderangko rim∙anioba gualani dongaha ine parakangaha. Mitamrang dosi donggenchimoba adita gipin manderangde maming dos donggijaan rim∙ako man∙aha ine NGO dilgipa Pritam Arengh aganangaha.
Manderangko rim∙aniara chingni sikani ong∙ja indiba a∙sel ong∙anio pangchakesa dakna nangao ga∙akaha aro iani bidingo man∙a dipet niatna jotton ka∙gen ine Chief Minister NGO dolrangna aganangaha. Rim∙ako man∙gipa manderangni kosako adita badi ka∙doanirang gnang aro raka section o pangchake re∙anggipa SP mokor doma ka∙angaha ineba Conrad Sangma u∙iataha.
CM uni ku∙rachaka gitan ru∙utgija salsa salgnini gisepo chanchie kam ka∙angna ka∙dongsoenga ine Pritam Arengh janapangaha. Unbaksana jamin ra∙na neng∙nikaniko man∙gipa nokdangrangko uamangna u∙iatpanichina mol∙molangaha aro man∙a dipet dakchakna jotton ka∙anggen ine ku∙chakangaha.
