Tura Upper Rongkhon ni ramarang namjabeani gimin nirokatchina jolni manderang mol∙molata

Tura Upper Rongkhon jolo Paikan-Tura-Dalu NH 51 ramarango a∙kilokrang bang∙ahani a∙sel salantio re∙ruraenggipa manderangna aro gari gorako salgiparangna re∙a doanio namen neng∙nikaniko man∙enga ine ua jolo songdongenggiparang u∙iataha. Ia ramarang namjabeani a∙selo garirangko salanio mikkangchi a∙selrang ong∙gniko champengsonagita jako ra∙enggipa department rangko niroke kam ka∙pachina uamang mol∙molangaha.

Ia nosto ong∙gipa ramarang Upper Rongkhon o donggipa MeECL Sub Station sepang jolo ong∙a. Ia ramako bang∙a garirang dingtang dingtang biaprangchi re∙na jakkala unbaksana dal∙dalgipa bostu salgipa truck garirang salantian re∙ruraanikoba dakenga. Jolni manderangni naljokanina aro re∙adoanio maming neng∙nikani ong∙jachina ia ramako ta∙rake tarie on∙china uamang didiangaha.