West Garo Hills a∙jani pulis dolrang pekatgipa bosturangko badinggipa saksako am∙sandianiko dake crore 2 mangni heroin baksa Sonibar salo rim∙nagita man∙aha. Da∙ororo pekatgipa bosturangko badingsrukgipa manderang a∙dokni pilak biaprangon batrikrikaniko nikna man∙enga. Pulis dolrangni ia mandeko rim∙na man∙aniara chang∙satai uamangna dal∙a chu∙sokaniko ra∙baaha aro a∙jao pekatgipa bosturangko niamni a∙palo badinganiko champengsona gisik nange niroksandianiko mesoka.
Unbaksana Assam-oni Phulbari-ona pekgipa bosturangko badingsrukna ringo re∙bagipa mande saksako koborrangko man∙soe pulis dolrang rim∙na gita man∙aha. Phulbari pulis dolrang Dhenarkuti Ghat-o am∙sandianiko dakengmitingo Assam a∙dokni South Salmara Fakirganj songni bilsi 30 ong∙gipa Soker Ali-ko ge 24 sabon bikop o pekgipa bostu gram 260 baksana plastic oniko gram 6 ong∙gipa aro mobile phone ge∙sako ua mandeoniko man∙aha.
A∙dok sorkari aro pulis department rang pekatgipa bosturangko badinganiko am∙sandie champengsonagita bakrime raken kamko ka∙enga. Ian uamangni mingsa mikkango done mongsongbatgipa ong∙e kam ka∙na tik ka∙giminba ong∙a. Pulis dolrangni jringna am∙sandianiko dake badinggipa manderangko rim∙na man∙aniara chadamberangko uamangoni naljoke rakkina aro jakkalaniko champengsona dakchakbeani ong∙a.