East Garo Hills a∙jani Williamnagar songjinmao gitchambatsranggipa sorkarini chalaienggipa Rongrenggre Higher Secondary skulko skotong Minister Conrad Sangma da∙al salni bako nirokeaniko dakangaha. Ia skulko 1964 bilsioni a∙bachengataha aro da∙ona kingking chalaianiko dakenga jeon class 6 oni 12 ona poraiani gadangrango skie ra∙na cholko on∙enga.
Ru∙utbea bilsirangonin wilwilao songdongenggipa chadamberangni namroro silroroanina aro bidako pakwate a∙jani tang∙doanina dakchakenganiko on∙angenga. Skulo poraienggiparangna namgniko ra∙bana ia gitchambegipa skulko rika cho∙ani rango namdapatnagita Sangma ku∙chakangaha. Ua somoio Sangma skulni adita chatro chatrirangko grongan baksa golporime uamangko gisik nange skie ra∙aniko dakchina didiangaha.
