112 number na ka∙ate tanggitik nangani somoio manderangna dakchakaniko on∙a a∙bachengata

‘Help us, Help you’ kattao pangchake tanggitik nangchongmotgipa somoirango dakchakaniko nanggiparang 112 number ona call ka∙e pulis dolrangni dakchakaniko man∙a am∙gen ine Pulis department parakataha. Ia namgipa ja∙kuko de∙anichi manderangni tanggitik nanganirango dakchakaniko on∙a jotton ka∙anian uamangni dakna nanggni kam ong∙a ine uamang janapangaha.

Ia number ara pulis dolnasan ong∙aigija gipin departmentrang jekai sanna bannanio, wa∙al kamarango, chi bana ong∙anio aro banggreani somoirangoba mikkangchi naljokatnagita dakchakaniko man∙a amgen ine Meghalaya pulis department u∙iataniko on∙ataha.