SGH a∙jao Chokpot-oni Sibbari-ona dakanggipa gital tarigipa PWD rama jasa ong∙gijaan nosto ong∙aha ine GSU Silkigre unit koborna parakataha. Chokpot Sub-Division ni ning∙o donggipa ramako bilsi 8 na galchipe tarigija donaha jekon ru∙utgija somoirangna skangsan matchote tariahaoba da∙on nosto ong∙aniko nikengaha ine GSU dolrang parakataha. Ia sorokko mangrakatna CCL Company chu∙onga gita bosturang jakkaljani a∙sel baikamna man∙jaha ine GSU Silkigre unit ni General Secretary Chingkam Ch. Sangma aganangaha. Uamang company ni kragija aro niamgita ong∙gija kamrangko ka∙anina rakken jegalaniko dakataha.
Sorokko tariani somoio department-ni officialrang nirok sandina nanga aro skele tarigija, dongimin niamogita jakkalna nanggipa bosturangko jakkalesa tarina nanga ine GSU dolrang parakangaha. Unbaksana Chokpot Civil Sub-Division o chu∙ongagita office rang dongjani a∙selrang manderang Baghmaraona nanga kamrangna re∙rurana neng∙nikanikoba janapangjolaha. Indake ong∙aiode Civil Sub-division songani maming namgni dongjaenga ineba uamang aganangaha.
Ia ramako re∙na wachikarini somoio namen neng∙nikaniko man∙ronga mongsongbate skul aro collegerango re∙giparang dukko chagrongbata ine uamang janapangaha. Ru∙utgijaan ia ramako companyrang an∙tangtangni kamko nipile tarie on∙pilna nanga ine GSU dolrang mol∙molangaha. Mol∙molaniko knachakjaode ra∙ka ja∙kuko de∙aona sokgen ine Chingkam Sangma parakataha.
