West Garo Hills a∙jani Selsella Block ni ning∙o donggipa Job card kam ka∙e cha∙giparang VEC Secretary aro President ni kosako DC na badi ka∙doangaha. An∙tangtang a∙kange ra∙gipa Haripur Part-I ni VEC Secretary Lal Bahadur Islam aro Haripur Part-II ni President Abdul Bashid Sarkar ni kosako Job card gnanggiparang MGNREGS ni chamgimin tangkarangko jakkalsretengani gimin uamangni kosako raka bichalko on∙china a∙jani DC ko mol∙molataha.
Badi ka∙doanggipa MGNREGS ni District Programme Coordinator ba ong∙enga ine u∙ina man∙aha. Uni aganani gitade uamang sakgni skang ong∙anggipa VEC Secretary aro President ni kam bon∙ani ja∙mano dikdiksa somoina nirokaniko dakna uamangna kam on∙aniko an∙tangni namgnina jakkalenga ine parakataha.
Batanggimin changrangoba uamangni tangka jakkalsretani rangko u∙iani ja∙mano baditaba changna jako ra∙e kam ka∙enggipa official rangna u∙iatangoba uamang sakgnini kosako maming bichal ka∙anirang dongja ine u∙iataha. Badi ka∙doanggipa MGNREGS project oniko uamangni tangkarangko jakkalsretgipa pilakon DC na seachiba mesokangaha. Uamang sakgni job card kam ka∙e cha∙enggiparangkosan togia ong∙jaenga indiba a∙dok sorkarikoba cha∙bokenga ineba badi ka∙doanggipa janapangaha aro uamangni kosako raka bichalko on∙e sasti ko on∙china DC ko mol∙molangaha.
