A∙dokni PHE Department Jal Jeevan Mission ni ning∙o ‘Water Guardians: Strengthening Sustainable Communities’ campaign ko a∙bachengate on∙angaha. Ia campaign-ko a∙doko chiko ripingna dingtang dakgipa cholrangko jakkalgipa aro mikkangchi jakkaltaitaina man∙a gita tarisogipa songrangko u∙ie ra∙na a∙bachengataha. Ia program-ona a∙dokni PHE Minister Marcuise N. Marak mongsonggipa ong∙e sokbaaha jeon ia campaignko Commissioner & Secretary, PHED cum Mission Director JJM Meghalaya ni Syed Md. A. Razi, PHED ni Chief Engineer B. M. Lyndem aro gipin official rangni dongpaanio a∙bachengate on∙angaha. Water Guardians ine aganon chiring chibisikko bon∙changatgija mikkangchina tangkame rakkina manderangni simsakaniko aro jotton ka∙aniko miksongani ong∙a.
Ua somoini bako Marak a∙doko chiko jakkaltaitaina man∙agita cholrangko ja∙rikna nanganiko aro chiko ripingna jotton ka∙na dingtangmancha aganangaha. Chiring chibisikrangko tipchangatgija jringna jakkalna man∙agita tangkame rakkichinaba ua manderangna aganangaha. Ia campaign o chirangko ripingani gamchatanirangko aro bon∙changatgija jakkalnagita dingtang dakgipa cholrangko songrango jakkalani gimin uamangni jotton ka∙aniko mande ra∙pilskaani miksongani ong∙a ine Marak parakangaha. JJM ni gita pilak songsalni manderangko re∙mikkangenggipa sal somoirango kamko ka∙na ja∙ku de∙anio bak ra∙pachina mol∙molanikoba on∙angaha.
