2015 bilsini March 4 tariko West Garo Hills a∙jani Oragitok songni skulrango GNLA ni manderang donga ine potchipe pulis dolrangni Sengbath Marak ko goe so∙otani bidingo minggni mokordoma ka∙aniko CBI jako ra∙e am∙sandianirangko dakangskachina High Court pakwatangaha.
Re∙anggimin somoio pulis dolrang Sengbath Marak ko GNLA dolni ong∙a ine mokordoma ka∙angaha. Pulis dolrangni agananiko ra∙chakna man∙jae, Sengbath Marakni pagipaba dosi donggijako skatang potchipe uni depanteko so∙oatasa ine jegale mokordoma ka∙angskaaha. Pulisrangni aro Sengbath pagipani ia ge∙gni mokordomarangko Meghalaya pulisrangoniko nambate am∙sandianirangko dakna CBI jako ra∙angskaaha ine parakataha.
