India a∙songni Chandrayaan-3 jajongo chu∙soke onchonga

Indian Space Research Organisation ISRO ni jajong ona July 14 tariko Sriharikota ni Satish Dhawan Space Centre oni watatgipa Chandrayaan-3 ni Vikram lander jajongona chu∙soke onchongena man∙aha. Jajongni South Pole jolo India a∙songan skanggipa changna onchongna man∙chenggipa a∙song ong∙e itihaso biming tarianikoba dakangaha. Uandake China, Russia aro America-ni ja∙mano a∙gilsak gimiko India a∙song 4 gipa changna jajongona onchongena chu∙sokgipa a∙song ong∙aha.