National Sports Day ko manianio antisa mangna kal∙susaani aro be∙en ni an∙seng baljoke donganina ranta ka∙anirangko a∙dokni dingtang dingtang biaprango August 22 oni 29 ni gisepgriko ong∙atanggen ine Meghalaya sorkari parakataha.
Ia manianiko ong∙atanio sakanti manderangko kal∙susaanirango bakko ra∙chinaba didiangaha. Ia manianiara dal∙bea a∙bachengatani ong∙a jekon Ministry of Youth Affairs and Sports rang jako ra∙e ong∙atangenga. Kal∙susaanio bakko ra∙giparang a∙song gimiko Fit India na ku∙mikchetani kattarangko mingangen. Apsandaken Meghalaya a∙dokba ia ku∙mikchetanirangko dake Social Mediarango mesokataniko dakanggen.
Ia susaanio bakko ra∙na cholko man∙a gita a∙dokni dingtang dingtang biaprango kal∙susaanirangko ong∙atanggen jekon Sports Association rang, skulrang aro District Administration rang ong∙atangskagen. Unbaksana a∙dok sorkarini departmentrangba gisik nanganiko mesokna Football, Cycling, Walkathon aro Basketball rango bakko ra∙aniko dakanggen. Kamtangtangona cycle sale ba ja∙achi re∙aniko daknaba didianiko dakanggen jekon adita somoini bako u∙iatgen ine sorkari parakataha. Apsan dakgipa kal∙atanirangko NYKS aro SAI ni gitaba ong∙ate uamangni member rangko aro gipin manderangko bakko ra∙china didianiko on∙a miksongani somoikoba u∙iatgen ine aganangaha.
‘Run for Fitness’ ko Shillongo August 26 tariko ong∙atgen jeon gimik bilsini manderang bakko ra∙nagita man∙gen aro iako Polo Ground o km 5 na wilwile katate a∙bachengatgen. Gisiko nanggipa manderang District Sports Officer, East Khasi Hills ni office gita bimingrangko segatna man∙gen.
August 29 tariko kan∙dikgipa programko ong∙atan baksa man∙a kragipa bakko ra∙giparangna tangka paisarangkoba on∙aniko dakanggen aro cultural programkoba ong∙atangjolgen. Apsan salon JN Stadium Complex ni MFA Ground o a∙dokni officer rang baksa MLA rang exhibition match kal∙suaanirangkoba dakanggen.
Kal∙susaanirangko dakaniara songsalo mandeskarangming bakrimaniko aro mikkangchi janggitanganio nambataniko ra∙bana amma. Ia National Sports Day o bakko ra∙e namnikatango kal∙susaaniko dake ku∙cholsan katchaaniko giproroatna Sports and Youth Affairs ni Minister Shakliar Warjri didianiko on∙angaha.
