A∙doko Medical college rangko rikchakate on∙a Sukrobar salni bako Cabinet tom∙aniko dakna tik ka∙aha ine Chief Minister Conrad Sangma u∙iatangaha. Ia chanchirimanio sanna bannaniko dakna skie ra∙ani a∙damrango nangchongmotgipa kamrangni bidingo golpogrikaniko dakangna miksongenga.
Batanggimin salrango Conrad Sangma, Health minister baksa iani bidingo adita ning∙tue chanchirimaniko dakangaha. Health Minister Ampareen Lyngdoh-oniko bang∙a u∙ina nanganirang dongkuenga jekon Cabinet tom∙aniko dake tik ka∙kujani gimin ua tale agana man∙kujaenga ine CM janapangaha. Sukrobar salni bako Cabinet tom∙aniko dake chanchirimaniko dilgiparang ra∙chakanggenchim ong∙ode chu∙gimik u∙iatanirangko Health Minister on∙anggen ine Chief Minister agandapangaha.
