Chess World Cup 2023 bon∙kamgipa kal∙susaani gittamgipa bako India a∙songni R Praggnanandhaa aro Norway a∙songni Magnus Carlsen rapid game-o kal∙anggen jeon uamangna a∙bachengo adita somoirangko chanchie kal∙na on∙gen. Uamangni kal∙ani badita somoi re∙anga inditan uamangna on∙gimin somoiko bakkandikroroatgen. Ia kal∙anio apsangrik ong∙genchim ong∙ode chegipako u∙ina man∙na gita blitz game ba kan∙dikgipa somoio kal∙aniko de∙jitna gita somoi on∙anggen.
Classical format-o kal∙susaanio Praggnanandhaa aro Magnus Carlsen apsangrik ong∙e chegipako u∙ina man∙kujani gimin tie-breaker ba kan∙dikbatgipa somoio kal∙susaaniko dakangskagen. Uamang sakgninan minute 25 ko somoi on∙e kal∙ataniko dakgen aro uamangni kal∙anio changprak de∙jitanina second 10 ko on∙dapanggen.
Ia kal∙anioba chegipako seokna man∙jagenchim ong∙ode changgni kal∙susaaniko dakangkugen, uano sakpraknan minute 10 ko on∙anggen, aro changprak dejitanio second 10 ko on∙dapanggen. Ia kal∙anioba apsangrik ong∙taigenchim ong∙ode sakprakna minute 5 ko somoi on∙e kal∙susaaniko dakatgen, uano second 3 ko changprak de∙jitanio on∙angskagen.
Ia kal∙susaanio sakgnian apsangrik ong∙e chegipako seokna man∙taikuja ong∙ode ta∙rakbatgipa aro kan∙dikbatgipa somoio kal∙aniko dakangskagen jeon sakgninan minute 3 kosan on∙ange second 2 kosan uamangni changprak de∙jitanio somoi on∙dapaniko dakangskagen. Chegipako seokna man∙kuja dipet ia apsan niamo kal∙aniko dakanggen.
