Manipur a∙doko so∙sojengjeng ong∙ani a∙selo Meghalaya a∙dokni sanna bannani a∙bao skie ra∙enggipa chatro chatrirangna neng∙nikaniko man∙engani bidingo ma∙mong sorkarioniko namgipa aganchakaniko knana ka∙dongsoenga ine Chief Minister u∙iatangaha. Neng∙nikako man∙enggipa chatro chatrirangna NEIGRIHMS aro gipin sorkarini skie ra∙chakram biaprango uamangna poraina biaprangko on∙china a∙dok sorkari Union Health Minister-na chitti sedoanikoba dakangaha ine Sangma aganangaha.
Union minister aro ma∙mong sorkarini gipin dilgiparang apsan chanchirimaniko dake ia mol∙molaniko namnike dakchaknagita mangsonge donaha jekon niamnigita tik ka∙anirangko dakkujaenga ine Sangma aganaha.
Ma∙mong sorkarini Agriculture Minister baksaba gronge chanchirimaniko dakon bakan namnikpaaniko mesokaha aro uni namgipa aganchakaniko knana ka∙dongsoenga ine Sangma aganangaha. Chatro chatrirangna uamangni neng∙nikanirangni bidingo niroke kam ka∙china ma∙mong sorkarina janapanirangko dakangkuaigen ine Sangma agandapangaha.
Poraienggiparangni naljokanina ma∙mong aro a∙dok sorkari rake kam ka∙angenga jeon uamangko campus-ni ning∙oan dongatpilna jotton ka∙enga. Ia ja∙ku de∙anirang altubeade ong∙ja aro bi∙sarangni ma∙apaarangba da∙o ong∙enggipa obostarangni bidingo namen jajrengenga ine Sangma aganangaha.
