Budbar salo National Health Mission (NHM)-ni Mid Labour Help Provider (MLHP)-ni kamna galgiparangni result-ko parakatgipao A∙chik saksakoba kamna biming nakatatjani gimin Meghalaya Pradesh Youth Congress (MPYC) suk ong∙gijaniko parakataha.
Ia kamko NHM-ni Director Ram Kumar saksan appointment-ko ka∙ahama, ma unbaksa saoba dal∙batgipa officer in-charge baksa kam ka∙e appointment-ko on∙ahama ine MPYC-ni General Secretary Junebirth C. Marak sing∙doataha. Jat basee kamna ra∙napaniko NHM Department-ni Director-ma, Committee ma Health Minister an∙tangtangni namnika gita appointment-ko on∙ahama ineba sing∙doataha.
Ia kamni bidingo Health Minister manderangna kobor ra∙timgiparangni gita parakatahama? Ma kamna ra∙napna skangan chu∙gimik manderangko basee don∙manahama ine MPYC sing∙doaha. Indakgipa kamko ka∙aniara chu∙gimikan niamni a∙palo ong∙a aro ra∙chakna man∙gijapa kamba ong∙a. Una agreba ia kamna basako interview-ko ong∙ate kamna baseaha ine MPYC ni dilgipa sing∙doangkuaha.
Indake kamna baseanio mikkang niteaniara jatsa jatgipin-ni kosako gisiko ding∙chaogrikaniko ra∙baani ong∙a aro ia obostani bidingo bil gnanggipa manderang ta∙rake nirok sandianiko dakchinagita MPYC didiataha.
