August jani 23 tariko programme ong∙anio a∙dokni skotong Minister Conrad K Sangma, National Education Policy (NEP) 2020-ni bidingo jajrenganirang dongna nangjawa, aro NEP-ko ra∙gatanio somoirangko on∙e ka∙sine chanchiesa kamrangko ka∙anggen ine parakataha.
NEP-ko ra∙gatani a∙doko gitalgipa skia poraia man∙ani bewalrang ong∙engani gimin poraichakram kutturirangko, skigiparangkoba nangdapkuenga aro uko bimang ong∙atna gita tangka gong 400 oni 500 crore rangko ta∙raken nangenga ine Chief Minister aganangaha.
College rang deficit ramako ja∙rikani gimin managing committee chi chalaigipa ong∙a jekon sorkari chalaianiko dakangjawa indiba jak on∙e dakchakaniko on∙angskagen. NEP 2020-ko ra∙gatna gita college-rango aro skigiparangni nikanio nambatgipa poraie skie ra∙ani bewalrangba ong∙enga. Bilsi 75 ong∙anggimin gitcham Education system-na bateba ia gitalgipa NEP 2020-o nambate chu∙gimik poraie skie ra∙aniko man∙angskagen.
Meghalaya College Teacher’s Association (MCTA) uamangni Non-Cooperation Movement ko dakanio a∙doko NEP 2020-ko ra∙gataniko jegalani dongja indiba skie poraie on∙ani bidingo nangchongmotgiparangko chu∙sokate on∙chinasa mongsonggipa dabianirang ong∙a. Uamangni dabianirangko chu∙sokatna gita nigrike kamrangko ka∙anggen ine Chief Minister aganangaha.
