Rajya Sabhani M.P W Kharlukhi ni jako ra∙e nirokenggipa Demdema block ni Gimegre songo ge∙e game cha∙ani bidingrango mikrakatani programko ong∙ataha. Ia skie on∙aniko West Garo Hills Agriculture Office Tura aro ATMA bakrime Saansad Adarsh Gram Yojana-nigita dingtang dingtang kamrangko ka∙e mesokaniko dakangaha.
Ia program-o Organic Manure Scheme ni ning∙o berkeley composting ba jabolrangko soate sal 18 ni ning∙ao a∙sal tarianiko manderangna skie on∙angaha. Unbaksana PM-KISAN ni gimin u∙iatanirangko on∙an baksa kamrangni giminba talate on∙e ua jolo game cha∙giparangni neng∙nikanirangko man∙ani bidingoba agan golpogrike chanchirimaniko dakangaha.
Miko ge∙anio nosto ka∙gipa jo∙ong gukrangoniko chel∙chakatna aro mi misirangni sabisiko naljokate nirokna man∙agita mikrakataniko ATMA official rang agantalate on∙angaha.
Ia programme ko ong∙atanichi ge∙e game cha∙giparang aro bakko ra∙gipa songni manderangna ge∙a gamani bidingo nambate u∙ie ra∙na cholko man∙angaha.
